मराठी अभंग - संत ज्ञानेश्वर - घनु वाजे घुणघुणा । वारा वाजे रुणझुणा

घनु वाजे घुणघुणा । वारा वाजे रुणझुणा ।

भवतारकु हा कान्हा । वेगीं भेटवा का ॥१॥

चांदु वो चांदणे । चांपेवो चंदने ।

देवकीनंदने । वीण नावडे वो ॥२॥

चंदनाची चोळी । माझे सर्व अंग पोळी ।

कान्हो वनमाळी । वेगीं भेटवा कां ॥३॥

सुमनाची सेज । सितळ वो निकी ।

पोळे आगीसारिखी । वेगीं विझवा कां ॥४॥

तुम्ही गातसां सुस्वरे । ऐकोनि द्यावी उत्तरे ।

कोकिळें वर्जावें । तुम्हीं बाईयांनो ॥५॥

दर्पणी पाहतां । रूप न दिसे आपुलें ।

बाप रखुमादेवीवरें । मज ऐसें केलें ॥६॥

<< सर्व अभंग